UCING
HUI
Di buruan anu aya tatangkalan atawa
pager, barudak ngarariung, rék ucing-ucingan. Ucing Hui atawa Huhuian.
Mimitina hompimpah heula babarengan
Hompimpah
tahu atah
digoréng
ku jalantah
Ma Ijah
tumpak gajah
seurina
hahahahaaah...
Nu meunang pangheulana bari cingogo nyekelan kana
pager kalawan pageuh pisan. Tuluy nu kadua nangkeup kana awak anu kahiji. Nu
katilu nangkeup kana nu kadua jeung saterusna, ngantay. Nu pangpandeurina jadi
ucing; leuleumpangan ngurilingan antayan anu caringogo bari nepakan taktakna
dibarengan ku kakawihan:
Kulunang-kelenéng
samping konéng
Kerejat-kerejut
samping kusut
Kurusak-korosak
samping rangsak
Buruwak-béréwék
samping rawék
+ “Toroktok-tok, urang lembur, aya Nini jeung
Aki di dinya?”
-
“Euweuh!”
+ “Ari éta naon nu tingjarentul?”
-
“Éta mah hui!”
+ “Meunang uing ngasaan?”
-
“Ké rék dikali heula.”
Ucing ngawih
kulunang-kelenéng deui bari nguriling, tuluy nanya deui:
+ “Urang lembur geus asak hui téh?”
-
“Ké keur dikulub kénéh.”
Ucing nguriling
deui tuluy nanya deui:
+ “Urang lembur geus asak hui téh?”
-
“Engges, tapi kudu diuyahan, cing geura néangan
heula uyahna!”
Ucing lumpat
heula ka nu anggang, teu lila jol deui bari ngomong:
+ “Yeuh
uyah téh mawa, cingan urang purulukan bari ngasaan nu pangluhurna!”
-
“Pék!”
Ucing ngabetot anu cingogo pangtukangna.
Lamun lésot tina antayanana, nu séjén geuwat lumpat tingberetek nyingkahan
ucing bari saruka bungah padajaringas ngaromong: “Lingasan
euy ucingna, ulah dilindeukan!”
Sanggeus carapéeun kakara areureun. Bari
ngareureuhkeun kacapé, tuluy dariuk bari ngong karakawihan minangka hiburanana.
1) Ambil-ambilan
Kaulinan
ambil-ambilan merlukeun batur nu loba, biasana dilakukeun ku barudak awéwé
jeung barudak lalaki sarta merlukeun tempat anu lega. Cara ngalakukeun kaulinan
ambil-ambilan téh biasana barudak dibagi dua kelompok, sakelompok anggotana
lobaan sedengkeun kelompok hiji deui mah diwangun ku saurang. Salila barudak
arulin ambil-ambilan biasana dibarung ku kakawihan. Nu unina saperti kieu:
+ Ambil-ambilan
turuktuk hayam samantu.
- Saha nu
diambil, kami mah budak pahatu
+ Pahatu
gé baé, purah nutu purah ngéjo, purah ngasakan baligo, purah tunggu balé gedé
- Nyerieun
sukuna kacugak ku kaliagé
+ Aya ubarna urat gunting sampuragé, tiguling
nyocolan dagé
Saréngséna
kakawihan nu pamungkas budak nu kapilih
sina lumpat nyampeurkeun ka kelompok nu ngan saurang téa, kitu jeung kitu wé
dilakukeun sababaraha kali nepika anggota kelompok ngurangan.
2) Congkak
Pakakas
nu digunakeun dina kaulinan congkak di
antarana congkak (dijieun tina kai, panjangna leuwih kurang 40 cm, lebarna
kurang leuwih 15 cm, luhurna dilogakan
sababaraha hiji) jeung siki
congkak (bisa kewuk, siki sirsak, siki salak, jsb). Unggal logak
dieusian ku kewuk lobana tujuh siki. Cara maénna piligenti, tepi ka siki
congkak téh béak (arasup kana logak indung).
3) Gatrik
Gatrik
téh kaulinan barudak lalaki. Parabot anu dipakéna kai atawa awi (panjangna
kira-kira sajeungkal) jeung kai/awi paneunggeul (nu panjangana kira-kira 30
cm). Cara maénna , kai nu sajeungkal téa dipasangkeun kana logak, geus kitu
tuluy diteunggeul ambéh ngacleng, terus diteunggeul deui sina jauh. Lamun geus
murag di hiji tempat, kai nu dipaké
paneunggeul téh dipaké ngukur ti mimiti
kai nu sajeungkal téa nepika logak.
Jadi, ukuran meunang jeung éléhna téh ditangtukeun ku jumlah ukuran kai nu
dipaké paneunggeul téa.
No comments:
Post a Comment